|
|
بهڕێوهبهری ماڵپهڕ: کۆچهر بیرکار
هەر زووتر پێشبینی ئەم ڕۆژەم ئەکرد. ئەمڕۆ ئاخرین ڕۆژی تەمەنی کۆڕی زانیاری و داهێنانە، کۆڕێک کە چوار ساڵی تەواو نەکردووە. ئەمیش با بە دەردی هەموو کۆڕ و کۆمەڵەکانی تر بڕوا. چەن ساڵ بەر لە دامەزراندنی ئەم کۆڕەش، لەگەڵ دۆستێکما کۆڕێکی ترمان پێکەوە نا بەڵام دوای دوو ساڵ داخرا. وادیارە داخران پەتایەکە کە کۆڕی کوردی ئەبێ هەر چەن ساڵ جارێ تووشی ببێ. لە نووسراوەی (کۆڕی زانیاری و داهێنان: سەرکەوتنەکانی و کەموکووڕییەکانی) باسی دەسکەوت و کێشەکانی کۆڕەکەم زۆر کردووە و ئەوە هەمووی لێرە دووبارە ناکەمەوە. کۆڕەکەمان بە ڕاسی پیر و پەککەوتەیە و هێزی ڕۆیشتنی تیا نەماوە و خۆم حەز ناکەم ئەونە بە کزی و داماوی بیبینم. باشترە بە هێواشی بیخنکێنین و بینێینە گۆڕی مێژوو. لە بەر دانان و بەڕێوەبردنی ئەم کۆڕە بڕێ کەس دەسخۆشییان لێ کردووم کە سپاسیان ئەکەم. بەڵام بە گشتی ئەم کۆڕە پشتیوانی زۆر کەمی کرا لە لایەن کۆمەڵگە و میدیای کوردییەوە - مەبەستم پشتیوانی ماڵی نییە. بڕێ کەس ئەم پرۆژەیانە بە هیچ و پووچ هەڵسەنگاند و بڕێ کەسیش قسەی ناشیرینیشیان پێ وتم. هۆی داخستنی کۆڕەکە ئەو قسانە نییە بەڵکوو بێچالاکی ئەندامانی کۆڕەکەیە. هیوام ئەوە بوو کە کۆڕی زانیاری و داهێنان ببێتە قیبلەی هۆگرانی زانیارییە سرووشتییەکان و ببێتە هاندەر بۆ نەوەی تازەپێگەیشتوو. لەوانەیە هیواکەم تا ڕادەیەک هاتبێتە دی بەڵام کۆڕ گەرم و گوڕییەکەی جارانی نەما و منیش بێتاقەت بووم. لەوانەیە من نەمزانیبێ چۆن کۆڕ ببەم بەڕێوە بەڵام کۆڕەکە هەمیشە کراوە بوو بۆ بیر و بۆچوونی تازە و جیاواز و زۆر جار بانگەوازم کرد کە کەسێ تر بێت کار و باری کۆڕەکە هەڵسووڕێنێ، بەڵام داخ. هەر جۆرێ بێ پەشیمان نیم لە دانانی ئەم کۆڕە و پێم وابێ شوێنپێی دیار ئەبێ لە مێژووی گەشە کردن و دامرکاندنەوەی زانیارییە سرووشتییەکان لە ناو کورددا. هیوادارم شتی تری وەکوو ئەم کۆڕە ڕوو بدا و ئەو مێژووە تەنیا تاریکی نەبێ. لەم سەردەمەدا ناکرێ تەنیا داگیرکەر لۆمە بکرێ، خۆیشمان دەسمان هەیە لە درووست کردنی ئەو مێژووەدا. سپاسی هەموو ئەو ئەندام و نائەندامانە ئەکەم کە بە نووسراوەکانیان جار و بار کۆڕەکەیان نەخشین ئەکرد. ماڵتان ئاوا بێ و سەرکەوتوو بن. کۆچەر بیرکار 2010 May 14
تازهکان
|